Haustið er komið og hið fallega litaspil hefst

Jæja, þá er haustið komið, skólarnir byrjaðir og blómálfarnir farnir að pakka saman. Sum trén eru farin að gulna eða roðna en þó eru rósirnar í garðinum mínum enn í hamingjublóma.  

Mér finnst haustið alltaf vekja frekar blendnar tilfinningar hjá mér. Það er svo fallegt þegar haustlitirnir ná að njóta sín og kertin eru óneitanlega notalegri á myrkum kvöldum. En að hugsa til langs vetrar og dimmu og kulda brrrrrr mér dettur bara í hug teppi og ullarsokkar. En þá er að njóta dagsins í dag með fallegu blómstrandi rósunum og að fylgjast með dásamlegu litlu blómálfunum alveg á fullu að undibúa vetrardvalann.

 Það er svo yndislegt að fara í berjamó, leggjast út af milli þess sem maður týnir berin og skoða smágróðurinn. Allir hugsanlegir litir saman og þvílíkur fjöldi af plöntum á litlu svæði og allir virðast búa þar í sátt og samlyndi   Köngulóin sem röltir yfir lyngið á leið sinni í leit að næsta æti og litla fiðrildið sem flögrar yfir. Plönturnar blómstra og bera fræ og nota goluna til að bera fræin til nýrra fæðingarstaða. Farfuglarnir æfa oddaflug og njóta þess með mér að taka inn síðustu grænku sumarsins, fallega blandaðri roða haustsins. Allt er í sátt og friði eins og vera ber, nú er ég tilbúin að fara inn og kveikja á kerti og taka á móti vetrinum.

 

 

Takk kærlega fyrir frábæra tónleika!

Frábært að fá tónleikana í beinni heim í stofu. Takk Kaupþing, takk RUV. Við sem eigum ekki alltaf heimangengt erum þakklát að fá fleira en íþróttir sent heim í beinni

Takk fyrir mig

Aldrei fleiri á Laugardalsvelli

Frábær helgi á Dalvík!

Vinátturefillinn fékk frábærar móttökur á Fiskidögunum á Dalvík. Ég þakka innilega fyrir mig og takk öllsömul sem komuð við í Ráðhúsinu.  

Við vinnum svo áfram að því að breiða út boðskap vináttu og þess hversu gefandi er að vinna handavinnu og gefa af sér. Heimasíðan okkar er www.internet.is/friendshiptapestry   

Það var virkilega ánægjulegt að hitta og kynnast fullt af nýju fólki. Ég er svo sannfærð um að vinátta getur haft jákvæð áhrif á þróun samskipta í framtíðinni. Við þurfum bara að sjá að það er skemmtilegt að við séum ólík og að engin landamæri eru óyfirstíganleg. Því fleiri sem vinna að því hver á sinn hátt, því betra, ekki satt?

Vinátturefillinn samanstendur af handavinnu eftir fólk sem hugsar um vináttu á meðan það vinnur. 261 bútur frá yfir 20 löndum í 5 heimsálfum, og stöðugt bætist við. Fyrir nú utan þvílíkt safn af ólíkum handavinnuaðferðum sem refillinn sýnir. Hann er nú þegar orðinn mikilvægt heimildasafn

Takk kærlega Dalvíkingar, knús Júlli og kærar þakkir öll sömul 

 

Rúmir sex metrar af vináttu og fegurð

Jæja, nú leggjum við í hann. Vinátturefillinn opnar sýningu sína í Ráðhúsinu á Dalvík á morgun föstudag kl 18.00, í tengslum við vináttukeðju Fiskidagsins Mikla.

6,40 metrar, 260 bútar frá 23 löndum í fimm heimsálfum, hver og einn fylltur vinaorku, þrá eftir friði og fegurð.

Engin landamæri, eina krafan er að vilja vera vinur

sjá heimasíðu Vinátturefilsins www.internet.is/friendshiptapestry