Gleðilegt sumar!

Síðasti vetrardagur var fallegur en nú er vorið og svo sumarið að ganga í garð. Dásamleg tilfinning! Fuglarnir eru byrjaðir að syngja og grasið í litla garðinum mínum orðið grænt. Kettirnir hlaupa um og leika sér úti og hundarnir neita að koma inn. Og ég fylgist með brumi stóra reynitrésins míns bólgna út og stækka. Bráðum fer að sjást í grænt lauf.

Þessi árstími er svo yndislegur. Lífið vex og blómstrar, dagarnir eru langir og bjartir, öll tilveran iðar. Öll framtíðin virðist augljóslega verða björt og falleg á svona stundum. Og það er gott að gleyma sér í Pollýönnu hugsunum og gleyma dimmu köldu vetrarnóttunum sem standa allan sólarhringinn. Það er nægur tími fyrir þær seinna þegar veturinn kemur aftur. En þá er gott að geta yljað sér við hlýjar minningar vorsins og góðra sumardaga. Svo það er um að gera að safna nægum fallegum minningum í sarpinn. 

Það er nótt núna og stjörnubjart úti, smá slæðuögn af norðurljósum. Svona rétt eins og til að kveðja árstíðina. Mér fannst ég heyra "stjörnusöng", óminn af plánetunum í fjarska, þögnin úti er það mikil á meðan mannfólkið og fuglarnir sofa. Hér inni í stofu hrjóta hundarnir við hlið mér og kettirnir mala í sófanum. Notaleg nótt að vaka í, því á morgun er komið sumar

 

 

Athugasemdir

[Júlíus Garðar Júlíusson, 19.4.2007 kl. 11:32]

Fallegar vangaveltur - Gleðilegt sumar - Áskorun HÉR í tilefni dagsins

[María Anna P Kristjánsdóttir, 20.4.2007 kl. 18:29]

Gleðilegt sumar, nú er fallegur tími framundan og kallar á það að fara í gönuferð, og vera úti.

[Ásgeir Rúnar Helgason, 20.4.2007 kl. 19:36]

Já, ég verð nú bara ljóðrænn af heimþrá! Haltu þessu áfram:

[Ragnhildur Jónsdóttir, 20.4.2007 kl. 21:02]

Þakka ykkur innilega fyrir falleg orð. Nú er það ég sem roðna

Hafið það gott í sumrinu

er komið alvöru vor í Svíþjóð?